祖國放寬自由行，特區政府又搞投資移民，個樓市當堂有少少偉哥feel，最開心係邊個呢？原來係市建局行政總監林中麟。
以前個市好，市建局嘅前身土發公司，日日俾人鬧佢哋係全港最大地產商，與民爭利，家陣梗係冇人再鬧佢哋啦，因為正如林中麟形容，「市建𠵱家係最大負資產」。
原來因為個市唔好，加上賠償額偏高，搞到市建局條條數都好似自由黨黨徽新轉嘅嗰隻紅色，要蝕本，咁政府講明每年撥二十億畀佢哋，全數係一百億，其他市建局自己諗掂；林中麟話，咁嘅形勢，梗係唔收樓重建住啦！
於是佢哋就轉移去復修啲舊而不殘嘅舊樓，任何人間樓有三十年樓齡，又收到建築署通知要維修，又有業主立案法團，最緊要屬市建局重建項目之一，就分分鐘有機會得到市建局嘅物資資助，好似出油畀你粉飾外牆，重搞好去水渠防沙士，真係一家便宜兩家着。
傳真︰2623-9278
電郵︰