國家總理溫家寶，日理萬機，周身唔得閒，又要管東北啲國企改革，又要管農民收入，又要處理冤民上訪，又要打貪掃黃，去到印尼峇里島開會，諗住乘機鬆吓，食番半打沙嗲，飲杯珍多冰relax吓，點知因為阿董唔生性，搞到啲港記一見到溫總，就纏住佢講特區問題。
溫總講嘢，一向溫文爾雅，又引用詩詞典故，出口成文，風格鬼死咁董橋，特區問題嘅罪魁禍首係邊個？溫總梗係清楚，不過佢一向都「話到口邊留幾句」咁解啫。
今次寶哥哥峇里講話，照例又冇提個董字，不過就好坦率咁承認，英國佬領導咗香港一百五十幾年，而特區政府嘅統治，只係得好短嘅六年，係缺乏經驗嘅咁話。
呢番說話，無疑相當感人肺腑，可惜，若然係六年前嘅七一主權移交嗰一晚，喺會展中心由江總把口講出嚟，警告港人治港全無經驗，好可能唔夠英國佬咁出色，咁香港好多人想買樓，都會諗一諗先，今時今日，香港就少咗好多負資產。
可能怕坦率得滯，返北京會有人詐型，溫總跟住補飛話，相信港人能治理好香港，又話希望特區政府要繼續發展經濟、改善人民生活。
香港人同溫總心意一樣，都相信港人能治理好香港，不過就唔相信阿董能治理好香港。
溫總又話，相信香港人只要團結，同心協力，香港就有美好的將來。嘩，溫總真係好勁呀──要求阿董下台，五十萬人大遊行，夠晒團結，亦同心協力，溫總終於認識到乜嘢係真理咯。
溫總跟住又話，非常高興，見到特區局勢穩定，經濟開始復甦，呢一樣係包括港人在內嘅所有中國人所樂見嘅。
呢句說話，即是含蓄警告阿董：嗱，𠵱家開放「屍爬」自由行，全靠國家，搞掂咗經濟少少，你好生吓性，唔好再癲，失驚無神又整埋啲沙士拒不問責制，又試搞到民意沸騰，嗰陣時溫總就幫唔到你咁多咯。溫總話中有話，唔知係咪喝住阿董，叫阿董咪再搞咁多小動作，唔好出咁多聲，最好咪再蒲頭，以免危害穩定、阻撓復甦呢？
溫總咁了解香港，礙於處境，冇晒言論自由，不過，佢已經盡晒力，將佢嘅立場收埋喺字裏行間，用「他心通」（佛家語，指心意相通）嘅方式交波畀香港人。香港人已經收到晒嘞，一定會借鑑加州大隻佬上台嘅經驗，依照《基本法》全力推進直選，加強經濟復甦嘅嘞。敬愛的溫總，請放心喇！
傳真︰2623-9278
電郵︰