「嗰一下爆炸聲嚇到我成個彈起，跟住見到架車火光熊熊。啲黑煙沖到上二十樓咁高，見到嗰個差人幾次衝向火堆，想去拉開車門，但係幾次爆炸，迫到佢不斷退後……」粉嶺馬適路烈火焚車燒死飛車手慘劇，一名住在附近榮輝中心的九巴司機目睹事件經過，用攝錄機拍下整個過程，他形容當時自己的心情由「興奮、緊張、害怕」，到最後腦海一片空白。
當了五年九巴夜班司機的李先生，昨晨十時許醒來時聽到一聲隆然巨響，嚇得從客廳沙發「彈起」。「嗰下爆炸聲好響，我下意識感覺到係撞車，但係走到窗口望，乜都冇。」
一分鐘後，他從客廳回到睡房，怎料一推開門，嚇得目瞪口呆。「黑煙湧晒入屋，成間房都係燒膠嘅臭味。」他說，伸頭望出五樓住所窗外，見到一輛銀色跑車停在路中，全車起火，火舌捲着濃煙升上半空。
「架車燒咗一分鐘，燒到火光熊熊，重有幾次輕微爆炸，我即刻用架DV機影低。嗰陣時，只有兩個差人喺架車側邊，一個去攔住其他啲車，另一個幾次衝向火堆。我睇住佢，每一次都伸出右手，最近一次，距離車門大概只有三呎遠，我覺得佢想去拉開車門，但係幾次爆炸，迫到佢不斷退後。嗰剎那，我覺得個差人好勇敢，同一時間，我都開始驚，因為我感覺到架車裏面有人，重俾火燒緊。」
李先生說，三分鐘後，大批消防員和救護員趕至，再過了七分鐘，看到救護員用紅布在廢鐵一般的車廂內抬出一具屍體。「我影唔到呢個畫面，個腦霎時間一片空白」。
李表示，用DV機攝錄火燒車的目的，原本想作為教材，教導即將五歲大的兒子，想不到結局如此不幸，「唔畀個仔睇啦。唉，總之一句大吉利是」。
記者：陳偉良