前晚西班牙盃華倫西亞作客對丙組隊卡斯迪朗，比賽到尾段因為主隊球迷掟嘢入球場搞到腰斬，本來亦無可厚非，不過初步決定場波可能會擇日重踢剩低嘅七分鐘賽事，咁就有古講嘞！
據報場波重踢呢七分鐘，會係由當時華倫西亞獲得十二碼嗰陣開始，比數亦維持當時嘅一比一，照睇華倫西亞贏面仍然好高。之不過無端端又搵日作客去到人哋球場踢七分鐘比賽，你話幾咁無謂呢？
呢個安排亦可能連累唔少外國波友，我求大俠知道有博彩公司暫時hold住唔落實派彩。如果博彩公司最後決定當普通取消賽事咁退飛，或者過關只以一倍計算，博咗華倫Ｗ嘅咪好唔抵？
噚日至講過雲達不來梅後衞卡斯達積下屆轉會史浩克04，點知一個轉身連巴西嘅艾列頓都係咁話。嘩！冇咗呢個射手不來梅真係幾大劑，因為佢𠵱家領前射手榜，又喺季初透露離隊，對士氣影響好大，而且會方重要畀人工佢，真係養住個叛徒成季，一啲着數都冇！
繼日前有三十七歲後衞梳亞雷斯被墨西哥重召後，綽號「魔鬼」嘅三十三歲玻利維亞前鋒艾茲華利，亦三年以來首次入選番，去美國友賽洪都拉斯。梳亞雷斯喺後防夠穩或者情有可原，但係要艾茲華利復出攻堅，就真係為玻利維亞足球悲哀，唔怪得佢哋積弱咁耐啦！
祖雲達斯森保達喺禮拜日聯賽對博洛尼亞賽後，自爆插水博到十二碼，引起廣泛迴響，連國家隊教練查柏東尼都開口評論。我求大俠唔係鼓勵人插水，但森保達無理由唔知賽後咁講一定招人口實，最衰係佢插完水又話自己其實唔鍾意咁做，夠晒矛盾，真係自惹麻煩。
湖人教練積遜噚日爆料話，為防高比仔今季可能打唔到波，曾考慮搵老友米高佐敦過嚟湖人幫手。不過波神即時發表聲明話百份之百唔會再復出。其實就算積遜保證今季攞硬總冠軍都打動唔到波神，因佢老人家𠵱家最想做老闆，自己話晒事，唔喺成四十歲人重同啲細嘅爭波打。