建滔化工（148）噚日上市10周年，喺好多報紙登全版廣告慶祝，而建滔股價亦炒高助興，最高見過8.95元，收8.70元，升4.8%，又創歷史新高。
經紀黃話，班芬佬追捧建滔，主要係歡喜間公司順從民意，唔再大拿拿拎幾億銀去搞電廠，所以隻股先至咁升法，不過隻股家陣升到咁高水平，再追實在冇乜肉食。
加上建滔有隻公司輪就快在年底到期，行使價只係5.80元，唔排除有人會行使，然後沽貨，令股價受壓。
至於建滔早前計劃收購的秀華國際（567），則可以密切留意走勢。
建滔自提出以每股0.45元全面收購後，原來到家陣都未收超過50%，消息一出，秀華股價就下跌3.37%，收0.43元。
經紀黃話，由於市場擔心建滔最終可能買唔成秀華，所以後者股價先至回軟，但佢就好有信心最終會成事，故此趁低入定貨，等候未來嘅注資大行動，不過要預咗有一定風險。
慕容小初