好姊妹，遊蒲台島觀奇石，鬧翻收場。
Cat堅決向左走：「我要探鬼屋先。」Bell拗頸向右走：「我話要睇佛手先喎。」包剪耷定勝負，猶幸Cat勝，行程必經的「天梯」只落不上，不用捱那900多級石級……
記者：陳漢榮
攝影：楊錦文
模特兒：Bell、Cat（RichStrategy）
蒲台島最著名的景點，首推離南角嘴15分鐘步程的佛手岩。走到石前，二人再度頂嘴，又是Bell先發難：「我話唔應該叫佛手岩，應該叫魔鬼之手。」Cat抵不過她包拗頸的性格：「人人叫開佛手岩，又邊忽唔似呀？」「得4隻手指嘅，重唔係魔鬼之手？」「計埋左邊嗰塊岩石，重唔似佛右手掌？」「計埋就似，不過又覺得似左手多啲喎……」
正確點說是先玩左邊的景點，首先往田螺石的一邊，再折返碼頭才上山。
Bell猜輸，仍不忿：「無厘頭睇乜鬼廟？拜定神驚一陣見鬼呀？」Cat懶理，自顧往碼頭左邊走。眼前的天后古廟，外表平平無奇，入廟，二人抬頭一瞥，橫樑處一排森森白骨，足有10呎長，正看得入神，廟祝忽如鬼魅般出現，大喊：「拜魚骨啦，保你哋平安。」喊得悽厲，嚇了Bell一大跳：「骨都拜？」「佢話拜咪拜囉。」「拜完好閃咯，出去睇田螺石好過，硬係覺得個廟祝怪怪哋。」「我都係咁話……」離廟不遠處，就是蒲台島招牌奇石之一的田螺石，側看，有掩有篤，遠近皆似，攀上此石有一定難度，別逞強。
看完田螺石折返碼頭，行左路上山腰，撥草尋巫氏鬼屋。Cat扮個鬼臉：「怕就唔好入去。」Bell膽小卻口硬：「唔去正衰女……不過講真，間鬼屋有幾鬼呀？」門前石階崩裂，樓房崩頹，磚牆野草叢生，裏頭黑漆漆，雖未至伸手不見五指，但陣陣山風透背而過，確實有點陰森恐怖，Cat壓低嗓子：「無幾鬼啫，話說鬼屋喺20年代落成，係一個南海籍姓巫嘅有錢佬起嘅，一家大細本來住得好好哋，但無端端成家人一夜間消失。」「跟住點呀？」「跟住？住喺山腳嘅島民，試過半夜三更聽到山腰有人嗌：『我哋死得好慘呀！』咁囉。」「嘩！你咪嚇我！」「咁低能，咁都信……」
別過鬼屋，棺材石就在附近，日光日白，Bell這趟可不怕了：「好大副棺材，睇Size，兩個你都瞓得落有餘。」此石呈長方形，棺槨兼備，顏色偏黑，論形狀色澤，確有九成似。
碼頭的右邊，景點較多，但山路較陡峭，所以自這邊落山折回碼頭的行程較佳。
攀過長石排，登山之巔，就是觀日亭。
Cat邊抹汗邊望着另一邊山下的「天梯」說：「好彩我猜贏咋，行右路上山就大件事。」Bell硬要鬥嘴：「唓！嗰百零級樓梯有幾難上啫？」「得百零級又點稱得上『天梯』呀？我話唔止，賭餐飯仔吖。」「一言為定。」下山，邊行邊數，到得山腳，二人已雙腿發軟，猶幸海風送爽，兼且只落不上，尚算舒服，結果Bell又輸一次：「超過900級，你贏囉，請你唔起咩……」
山腳底有另一景點掏金崖，因何而名有二說，一說是百多年前有貨船在此觸礁沉沒，島民得知船內的金條散滿對開海域，紛紛下海尋金，興過一輪掏金熱；另一說是此處盛產紫菜，在舊時代，紫菜可值錢，撈海苔可等於撈金子。
山過山，嶺過嶺，奇石不計其數。
先有站在路邊的僧人石，沒有路標指示，很易走漏眼，Bell上下研究，搖頭：「都唔似嘅。」Cat反駁：「有頭有身，重唔似？畀啲想像力好唔好？」再來是靈龜爬山石，近看，的確不似，但一站上對面小山崗，居高臨下看，龜背龜首即活靈活現，最神似還是龜眼位置那一點綠。Cat拉着Bell的手，硬要她同行南角嘴，「帶你去南極，值得一睇嘞啩？」蒲台島是香港最南島嶼，南角嘴是蒲台島最南一嵎，對出就是南中國海，遙望唯一陸地是大陸擔桿群島，自然是港境南極了。
上山落坡4小時，又到還債的時候。
行畢景點折返碼頭，Bell說：「願賭服輸，請你去耀記整碗馳名河粉喇。」除了明記海鮮酒家外，耀記士多算是島上最規模的食肆，魚蛋河與泥鯭粥一絕，食飽，Cat說：「食飽就過隔籬『蒲台二嫂』買海味乾貨，一齊講價呀。」二人難得槍口一致，最後$10包的海帶、昆布、紫菜，滿載而歸……
交通 可在香港仔或聖士提反灣乘街渡直接前往，船程分別為1小時及半小時。喜記街渡（來回程每位$40，電話：25544059）
