《射鵰英雄傳》之華山論劍，不但深入民間，重成為同志界嘅暗語㖭，《笑傲江湖》中令狐沖與小師妹比劍，華山已經係金庸小說嘅領土，因為十五部金庸作品中，十三部都有華山嘅蹤影。
陝西旅遊局噚日搞咗個「華山論劍」，不過就冇格劍嘅粗豪行動，而係「無招勝有招」嘅文化盛事，雖然冇東邪、西毒、南帝、北丐同中神通，但有武俠小說「一代宗師」金庸親自上陣過三關，一樣咁精采。
首先，金庸（圖）要親自評選三位曾飾演黃蓉嘅女演員，大師做過選美評判，揀女當然係強項，由當時得令嘅周迅獨得「聰慧」同「嬌媚」兩個美譽。金庸筆下英雄不乏酒癡，理所當然被主辦單位考考佢對唔同朝代酒器嘅認識。《天龍八部》中，虛竹巧破棋局一幕為人津津樂道，金庸要面對嘅最後一關，就係要完成由棋聖聶衞設下嘅殘局。
年屆八旬嘅金庸，過三關後仍然鬼咁生猛，重獲贈一個刻咗「華山武林盟主」嘅青田玉巨印，吸引中港台等六十幾間傳媒採訪，場面重盛大過江總巡遊，查大俠先至係中國文化嘅五嶽之中超級教主呀！
傳真︰2623-9278
電郵︰