繼日本豐田車廠為旗下嘅Estima（即港版Previa）推出Facelifted新版，同埋本田車廠將會為Odyssey推出新一代型號後，那邊廂嘅萬事得車廠，亦響日前宣布為MPV推出多個新版本，務求以此吸引買家注意。
由於新車擁有多個不同版本，當中最吸引包括有Aeroremix及Sports型號，兩者都係走跑車化路線，故此全車裝有跑車化包圍、巨型跑車合金胎軨、跑車化尾喉等配搭，從而令車子嘅造型變得更富吸引力呢！至於車廂方面，除空間依舊來得寬敞闊落外，三排座椅亦可按需要收摺放平，以增加載物容量，又或者營造出一張敞大嘅卧鋪；另外，廠方更為新車換裝上三幅式跑車軚環及電鍍車門把手，吸引力因而增加不少。
雖然新車仍沿用2.3公升及3.0公升引擎配搭，但當中嘅2.3型號就改用上一套全新4前速自動波，轉檔反應較前變得更見靈敏暢順；未知香港代理方面，何時會將之引入呢？
