港股噚日大玩過山車，上午一度急升至11885，升幅達162點，下午突然插水式倒跌75點，市場人士即刻議論紛紛，市傳九倉（004）同中銀香港（2388）配股，照計兩股就算真係批股，亦冇咁大影響力，令大市跌得咁厲害。好彩港股尾市反彈，全日只跌3點，收報11720，成交190億元，中動移（941）升3.5%，成為支撐大市主要動力。
黑客話，美電回升至7.7458水平，反映資金正流出，港滙有轉勢迹象，可能係港股回軟原因。嘩，港股近排升勢由資金主導，如果資金流走就真係大件事。不過外滙界朋友就估計美電屬技術性反彈，資金未有大舉流出，只係入得比以前慢。據講係因為中國傳出無限期押後推出QDII，所以有意流入香港的資金轉趨觀望。
建滔化工（148）最終放棄英德水電廠投資，股價噚日逆市升4.8%。建滔公布呢個項目時，收到唔少芬佬投訴，話佢偏離老本行，花錢去搞電廠可能會拖低股本回報兼增加負債比率，一度令股價受壓。如今決放棄投資電廠，轉移增加投資5億元擴充現有生產力。芬佬滿意，股價表現亦自然靚靚。
滙盈（8101）與新濠國際（200）兩隻澳門賭業概念股已停牌兩日，原本有消息話噚日應該可以復牌，點知又好話有啲嘢未搞掂，所以復唔到牌。
據聞滙盈好似攞到一份澳門賭場好筍嘅IT合約，至於點筍法？ｉ師傅話要遲啲收齊料再講，以免報錯流料。
阿 虎