電器大王蒙民偉經營嘅信興集團，今年踏入五十周年，佢噚日喺電台接受訪問，憶起當年引入日本樂聲牌電飯煲嘅艱辛事迹，雖然並非第一次聽，都令八方好感動。
蒙老話，嗰時啲人用火水爐煲飯，唔知電飯煲係乜東東，日本貨畀人嘅印象係化學嘢，加上美國有報道話使用合金產品煮食會致癌，電器舖對住佢隻電飯煲，都擰晒頭。佢惟有攞住個電飯煲，同兩孖臘腸，走去渣華街啲公屋，逐家逐戶向啲師奶推銷，初時都冇人理佢，後來大家熟絡咗，先至贏得師奶界口碑：「幾好食喎，又方便」。
佢重諗到條橋，就喺食飯時走去飛髮舖，等人哋唔得閒煮飯時，就用電飯煲煮臘腸飯畀人食。就係咁，電飯煲漸為市民所認識、受落。
成功，真係一步一腳印咁搏番黎；今時今日嘅香港人，有幾多個肯咁搏呢？
傳真︰2623-9278
電郵︰