香港人聽音樂歌劇，手機亂響，呢樣惡習，世界聞名，就連立法會議員，亦好難戒甩。
唔知係咪議員放完假未收拾心情，噚日立法會開會，傾緊楊森提出有關政制改革條質詢題目，何鍾泰一起身講嘢，竟然有手提電話喺議事廳響起，事務員拿拿聲攞走個電話，走去會議前廳搵吓，究竟係邊個，做埋啲嘢咁有厭惡性？
主席范徐麗泰向何鍾泰道歉，但范太都控制唔到個電話噃；冇幾耐周梁淑怡攞住手機行入議事廳，重立即向主席耍冧，原來個電話係周梁嘅，事後周太好唔好意思咁話，估唔到第一日做內務會主席，就即係犯咁大個錯喎！
咁又係，入咗立法會，好熄機喇，你估同個金毛男朋友喺旺角，睇緊午夜場？曾慶紅係唔會急call上去面聖嘅，放心喇。
（圖）周梁咁大懵留低個電話，重任佢喺議事廳猛響，真係失禮晒！
傳真︰2623-9278
電郵︰