再一次證明紅人未必撈邊瓣掂邊瓣，被喻為新任歌姬嘅中島美嘉，第一次拍電影《偶遇最壞少年》，有大堆演技派好似池內博之同高橋克典等撐場，數靚女就有佐藤江梨子，但上映咁耐套戲嘅反應都係麻麻，據知係因為一向sell冷酷嘅中島，全套戲都真係得一個表情！
套戲入面中島有強迫性障礙嘅精神病，令佢每日不停咬自己唔食嘢，成日好似雲遊外太空咁。
觀眾認為佢做唔出有病而搞到好鬱悶嗰種感覺，佢一時着到好潮，一時又玩噱頭着校服遊街，甚至一身OL套裝踢人下體，似係演緊藝人中島美嘉，多過一個病人。
我羅拉反而覺得其他演員嘅戲值得一睇，例如拍過《青春電幻物語》嘅市原隼人，今次佢又係演偷CD嘅飛仔，不過扮演在日韓國人嘅佢，為咗令死咗嘅家姐可以回鄉安息，千方百計偷運屍回韓。未夠二十歲已經被認定係演技派嘅佢，代替中島為套戲搶番唔少分數。
大家亦可以留意吓佐藤江梨子，佢今次扮演一個心地善良嘅良家婦女，一洗佢嘅壞女人味。