自由黨唔知聽咗邊個「高人」指點，連黨徽顏色都賣埋，班土共睇到，真係唔知好嬲定好笑，八方嘅同事就發覺，自由黨染紅咗腳嘅新logo愈睇愈似《蘋果》嘅嘜頭，唔通田少想爭取多啲中產支持？
八方就認為如果要向祖國交心，就不如爽快少少，一次過用晒紅色，使乜分階段赤化咁麻煩。
創黨主席李鵬飛梗係更加冇眼睇啦，佢話舊黨徽係名設計家靳逮強作品，寓意集合各階層人士，𠵱家改成咁，佢都冇乜好講，反正飛哥都退咗黨，仔大女大，田少同周梁佢哋癲，飛哥都唔理得咁多咯。
所謂人各有志，飛哥猛話自己好錫周梁兩個女，所以唔想反駁呢位行會新貴嘅言論，搞到啲後生誤會，「佢哋要同我劃清界線，做畀北京同老董睇，重有乜好講。」
飛哥希望自由黨唔好搞錯，中方唔係同佢哋老友，只不過睇票份上暫時受你玩，打住兩圈先，如果明年選唔到，食唔出，重會睬你咩，到時同佢計埋七七事變嘅歷史問題，反枱都似。
傳真︰2623-9278
電郵︰