楊永強係咪應該辭職，已經成為下亞厘畢道同中環班官商茶餘飯後嘅研究課題，究竟楊局長應唔應該效法阿松，退一步海闊天空，真係各有說法，但八方知道楊局長身邊友好，個個都勸佢無謂再留戀，更有人勸醫管局主席梁智鴻都一於辭埋職，實行開問責風氣之先咁話。
金刀梁走唔走，八方唔知，但知情人士話，楊局長已經有晒起身準備，任何時間都可以行出部長樓，但問題係我哋最鍾意保護下屬以示自己係好老闆嘅特首，幾時肯放過少爺強呢？有官員分析，老董再攬楊局長，等於攬住一齊死，亦貫徹老董凡事要壯烈犧牲嘅思維。
假如放少爺強走，乜時間最好呢？高人建議，一係政府宣布成立沙士基金嗰日，一次過滿足病人同家屬訴求，一係等立法會成立專責委員會之前，等班議員唔可以大做文章，如果唔係就算局長起身行人，老董一樣大把手尾跟。
（圖）有人勸楊永強（圖）同梁智鴻辭職，實行開問責風氣之先。
傳真︰2623-9278
電郵︰