早前提過芬佬好似對工業股有多少食滯嘅感覺，所以小型工業股配售行動愈來愈少，但唔代表冇證券行推介，只係唔似以前咁多。
經紀黃話，先排幫泰興（389）、冠華（539）同埋林麥（915）搞過配售嘅一間歐資大行，市場傳聞佢哋有意幫利民實業（229）配股集資。
小初記得早前經紀黃都提過利民，市場傳批股亦傳咗好一段時間，但就搞嚟搞去都唔成事。經紀黃話，其實主要係價錢講唔掂，而傳聞幫手批股嘅證券行亦傳過好幾間，最新就係上述嘅歐資行。
小初唔懷疑呢間大行嘅實力，但利民近排走勢就認真一般，一升到2.60元水平，就見到大量沽盤出現，好似噚日亦見過2.60元，結果倒跌1%，收2.55元。
經紀黃就話唔擔心，大行嘅實力雄厚，只要睇番佢哋幫過手嘅股份表現，就知十分勁抽，除咗冠華因為近排受棉花價格上升，令股價下跌外，其餘林麥噚日升7.14%，收3元，泰興家陣仍在高位5元徘徊，可以投信心一票。
慕容小初