新加坡資政李光耀上月慶祝八十大壽，李超人到賀，重坐喺主家席㖭，呢件事八方已講過，今次要講件漏網新聞。
原來，壽宴當日，新加坡總理吳作棟公布，以李光耀嘅名義喺新加坡國立大學設立一所公共政策學院，但新加坡經濟差，呢間學院嘅經費就要向富豪及名人「打心口」，壽宴當晚坐喺李資政身旁嘅李超人自然鼎力捐助，據稱誠哥以和記黃埔名義捐出一百萬坡元（折合四百四十七萬港元），其他捐成百萬坡元嘅多數係星洲商界猛人，好似黃鴻年咁；捐款總額達三千二百三十萬坡元（折合一億四千四百萬港元）。
星、港互相競爭，但唔可以話係敵人，何況超人前排先去新加坡集資，佢咁做絕對係聰明之舉。誠哥嘅慈善手筆，惠及新加坡華人，進一步重邁向國際㖭。最令人感興趣嘅係，若董特首有日要搞間學院，又可以搵到幾多捐款呢？
傳真︰2623-9278
電郵︰