恒地（012）配股後噚日勁插8%，連配股價都跌穿埋，收報32.10元，成交36.3億元，扣咗30億元配股上板，仍有6.3億元成交。
據聞今次滙證坐貨唔肯周街派，所以恒地跌破配股價後獲得大盤承接。按噚日表現嚟睇，恒地配售後經過大震倉，基本上已完成尋底，後市可能重有少少餘震。不過，大市資金充裕，噚日港股跌至11624，好友即推高滙豐（005）與中移動（941），令大市跌幅收窄至只有10點，在此情況下，相信恒地好快就重拾升軌，隨時出現挾淡倉。
恒地配完股後，市場又傳出多隻地產股會配股，包括新世界（017）、鷹君（041）、太古A（019）及九倉（004）等，不過冇一單係堅料。
噚日未開市已停牌嘅首長國際（697）話配股，但聽聞公司主要向大股東首鋼以及主要股東長實（001）等低價配售新股，唔會有貨流出街。據講配售3.5億股新股，每股作價0.32元，大幅折讓逾15%，集資額逾1億元，集資所得主要向秦皇島首秦金屬材料項目注資。
市場原本憧憬中央會在國慶假期內再出招挺港，但至今仍未有聲氣，最多只係傳出中央可能會向粵投（270）提供基建項目，作為東江水減價的補償。對粵投嚟講，其他基建項目又點及得上東江水實賺咁正呢？總之東江水一旦減價，一定會對粵投帶來負面影響。香港人要中央補貼水費，阿虎實在感到羞家。講窮，國內大把地方窮過香港，點好意思收中央呢份厚禮？
阿虎