當人人話今次「秋官效應」冇效時，恒指噚日一度下跌110點，趙飛雲重以為秋官發功力壓好友，點知午市輪到好友發威，恒指最後只跌10點，收11723。不過期指轉低水，加埋外圍美股期指亦下跌，睇嚟「秋官效應」今日或者再發揮。
趙飛雲前日聽到恒地（012）批股，第一個印象係覺得同二三線股批股冇分別，都係批出街畀人炒，但噚日地產股跌到天昏地暗，不但恒地本身大跌8%，收32.10元，連批股價亦不保，新地（016）亦一度大跌4.5%，低見63元，而近3日急升的太古A（019）更大幅回吐5.4%收市，拖累恒生地產指數大跌3%。
地產股對恒地批股反應咁激，可能有大戶借消息沽貨換馬，想買地產股不妨睇定啲，唔好太心急。
至於大戶換馬嘅對象，暫時睇嚟係電訊股，中移動（941）近期走勢十足矮仔上樓梯，唔覺唔覺已升近7月頂部21.60元，噚日收21.40元，升1.2%。過去4次試頂不破，擺明阻力十分大，今次若破位，首個目標23.50元，升唔穿則會回試50日線20.20元。
近排炒到會飛嘅亞細安，昨起正式易名為茂盛控股（022）。公司自從新大股東上場後，股價節節上升，昨收2.85元，再升6.5%。
聽老友講，新大股東劉根山人稱「公路大王」，在內地控有總值逾百億元公路項目，將來會否注入茂盛，惹人憧憬，隻股炒得咁熱，或與此有關。趙飛雲早前已將茂盛列入留意名單，但一來嫌佢升得急，二來又唔睇好短期後市，都係等調整先至諗。
趙飛雲