老董有難，眾高官梗唔可以坐視不理，好似煲呔咁，雖然扭襯條頸，都要頂硬上護主，今日聯同詩姐姐同林D9齊齊去立法會幫拖，反駁劉慧卿要老董引咎辭職嘅動議。
其實「董建華應該繼續做特首」係一個好好嘅辯論題目，啲大學應該成日攞出嚟講吓，睇吓有乜嘢高見可以畀特首辦學吓嘢。
當然呢個議題已經全無新意，董先生都講過好多次佢會繼續全心全意為港人服務，你哋鍾唔鍾意都一樣。
八方最關心煲呔條頸，聽講話有進展，但係未好番。其實煲呔應該多謝老董唔畀嘢佢做，君不見所有老董重用嘅問責高官都衰晒，連最後一個契仔楊永強睇怕都保唔住，你話有乜好處？煲呔以不變應萬變，反而民望最高，你吹咩。
（圖）煲呔曾行步都唔敢擰頭，真係戥佢辛苦。
傳真︰2623-9278
電郵︰