女健身教練夠細心

一般見解，健身教練一定是肌肉發達的大隻佬，但隨着潮流興做Gym，一班身材苗條兼擁專業資格的女教練成為搶手貨，她們對收身、器械鍛煉及營養學的專業知識都不弱於鬚眉。　文：李勇明 　圖：王子俊

本身在中文大學修讀營養學學位的Sheron，投身健身教練工作接近一年時間，她說：「除營養學外，我喺大學時期都有修讀運動科學。由於我唔想畢業後去營養中心工作，只研究飲食對健康既影響，忽略運動對身體嘅重要性。所以我一畢業就去考健身教練證書，實行做個專業健身教練，透過運動與營養學兩方面配合，幫助有需要減肥嘅朋友。」

朋友角度出發重關心
特別為辦公室女士們設計減肥餐單（見附表）的Sheron，認為做健身教練最重要是細心，Sheron的教練心得是：「首先要令顧客對做Gym產生興趣，等佢哋有恒心做足自己設計嘅鍛煉同餐單；其次就要留意顧客嘅健身進度，記性一定要好，溝通上最好由朋友角度出發，畀多啲關心，等顧客盡量保持輕鬆狀態。」
另一位女健身教練Kat，以前工作是採購員，由於她不甘在沉悶的辦公室上班，加上對運動充滿熱誠，五年前考取ISSA教練證書後，立即投身減肥專家行列。阿Kat說：「我好鍾意運動，游水打波樣樣得，重做過救生員。最初接觸健身運動大約係八年前，一試難忘。思前想後，有乜好過將興趣變為職業，所以決定轉行教人做Gym減肥。」

不甘沉悶興趣轉職業
同時擁有健身單車操證書的阿Kat，最近更考取了護脊教練課程，她說：「好多人健身做Gym，以為踩踩單車，做十幾分鐘器械就可以減肥收身；其實如果咁簡單，健身教練根本唔需要存在。我哋嘅工作係一種專業，除咗要保障顧客既安全，亦要做到顧客預期既減肥目標，好有挑戰性，成功感亦好強。」

4招女士修身鍛煉
1.啞鈴彎舉（DumbbellCurl）
簡介及功效：女士容易出現「bye-bye手」（手臂鬆弛），簡單的啞鈴彎舉可收緊手臂三頭肌。

2.坐式划船（SeatedRow）
簡介及功效：女士背部的肌肉直接影響身體曲線，坐式划船可收靚背肌線條。

3.健身單車操（Cycling）
簡介及功效：極速消脂的帶氧運動，練習四十五分鐘可燃燒八百卡路里。

4.健身球腹捲（FitballCrunch）
簡介及功效：利用健身球的不穩特性，簡單進行仰卧起坐鍛煉，對收腹減肚腩有明顯幫助。