韓國變性女星河利秀日前喺台灣拍攝劇集《嗨！親愛的》，呢套劇噚日有宣傳活動，台灣演員施易男噚日爆料話與河利秀拍戲好可怕，佢話河利秀會用鱆魚嘴猛咁吸佢嘅下嘴唇唔放。河利秀由男人變性為女人後，同佢拍親嘴戲嘅男星始終覺得有啲難頂，施易男話：「她嘴巴好大，好像鱆魚一樣，把我的舌頭都吸了出來。」
河利秀喺呢套劇戲份唔算多，但咀戲嘅比例就真係多喇。前晚佢同施易男拍嘅咀戲，劇情係講佢兩個鬧交，佢為咗𠱁番施易男，決定強吻對方。導演都唔知係咪有心整蠱，一味叫NG，結果共拍了五次，幾乎拍到施易男嘔白泡。馮仁超都替男主角慘，俾個變性人咀喎，真係唔係個個接受到。
梅艷芳後日四十歲生日，佢嘅愛徒何韻詩噚日喺新城做訪問時，阿詩知道阿梅今年唔想大搞生日，所以大家應該會一齊食餐飯就算，阿詩重話食齋冇所謂，最緊要咪舟車勞頓，因為唔想阿梅辛苦之餘，阿詩本身亦進入死亡錄音期，趕錄音趕到癲，都係唔好去咁遠會方便啲，阿詩真係為得人又為得自己喇！
關德輝去完非洲肯雅拍無綫旅遊特輯，佢話出發前已經事先張揚自己食齋，希望可以唔使食古靈精怪食物，亦因為咁帶咗好多乾糧，點知去到至知原來肯雅有好多好嘢食，結果帶去嘅乾糧原封不動。十日行程，其中一個景點係參觀野生動物保護區，佢重親手餵飼料畀長頸鹿食，搞到一手都係長頸鹿口水。
記得胡杏兒舊年台慶佢話過差啲同人撞衫，好彩佢咁啱同人講開，最後先至冇出現咁尷尬嘅情況，佢話十二號無綫啟城大典冇時間搵衫，咁啱拍《彩虹橋》識到WalterMa，佢就義助胡杏兒，幫佢設計一件紅色連身裙，胡杏兒話：「因為舊年件事，今年都冇諗住去名店買，再加上冇時間，真係好多謝WalterMa。」
徐若瑄嘅新專輯《我愛你×4》短短一個禮拜喺台灣賣咗三萬張，雖然成績好好，但係就引發咗樂評話佢唔識唱歌嘅風波。噚日徐若瑄喺台北舉行嘅慶功宴度替自己平反，佢話只要歌迷鍾意自己嘅音樂就得，唔一定要唱到繞樑三日先至叫做好喎。
羅嘉良都算係有面子，佢冇續約無綫，但係無綫今個月十二號舉行嘅啟城儀式，羅嘉良都有份出席，噚日佢返無綫為節目巡禮試造型，記者問起佢關於啟華涉嫌喺內地召妓嘅事件，佢話，大家要畀啲空間啟華，嘉良同啟華老友，梗係幫佢說話啦，重乘機話自己上內地拍嘢，連應酬都冇，以表清白。
