喺紅磡整咗全球首個金馬桶嘅恒豐金業老細林世榮又有新搞作，八方噚日同林老細食晏，佢話已經簽咗球星朗拿度做公司宣傳大使，又話朗拿度遲啲會嚟香港幫手做宣傳㖭；但佢就唔肯講用咗幾多錢，八方諗筆錢應該都唔會少。
除咗金馬桶外，林生噚日不停咁講自由行對香港經濟有幾好，話公司經已買咗四部旅遊巴士，準備喺旅遊區免費接送班大客嚟紅磡參觀佢幾間展館，林世榮話，嗰四架唔係普通旅遊巴，重係宣傳工具，因為每架巴士外面畫有馬桶連半身嘅圖畫，所有坐上該巴士嘅乘客，都會好似坐喺馬桶上面！咁都未止，喺巴士開門同關門時，重會有沖廁聲播出，務求令乘客有更真實感覺喎。
呢條果然係屎坑橋。
﹙圖﹚朗拿度八月為皇馬嚟香港踢表演賽時，曾經去參觀過金馬桶，開吓眼界。
傳真︰2623-9278
電郵︰