港股連升4日，終於出現調整，事有湊巧，恒地（012）早唔配股，遲唔配股，剛啱就在秋官新劇登場之日伸手，抽水30億元，拖累到地產股全面下跌，若非恒地配股，賽果可能改寫。
恒指一度低見11624，跌110點，但基金買盤仍活躍，午後市勢回升，結果恒指僅跌10點收場，期指則轉為低水8點。除大行同基金繼續選擇性吸納外，小投資者多數坐定定，唔少重一路減磅，下跌股（不計認股證）382隻，重多過前日兩成。
噚日大市能在高位守穩，主要係兩隻大藍籌嘅功勞，滙豐（005）同中移動（941）都有進帳，前者升1元，後者升0.25元，大戶卒之要出動到呢兩張王牌。至於紅籌股，則繼續有大行追捧，招商局國際（144）、華創（291）、中遠太平洋（1199）同上海實業（363）都分別上升3至7個位，大行咁樣買法，後市好大機會可以再升1至2成。
噚日成交175億元，扣除恒地配售之數，實得145億元，跌市而成交縮，沽售壓力並未如想像中大，整固後再上，可見12000。芬佬來料，話國企股短期會炒一轉，噚日國企指數就上升近48點，升幅1.4%，交投最活嘅以華能（902）同江西銅業（358）最突出，前者升4.6%，後者升5.4%，走勢就以江西銅較勁，剛好以大成交而突破高位阻力，照度上去，目標指向2.4元。
另一隻要留意嘅係第一太平（142），上周五衝破1.4元阻力，急升到1.58元後，在高位形成旗形，今日好大機會破位而上，以量度升幅計，短線可見1.83元。百富勤報告指一太將會跑贏大市，現價比每股資產淨值3.7元大幅折讓58%，短期目標價由原來的1.8元調升到2.04元。
03年度（12月年結）的上半年，一太盈利3670萬美元，上升37%，每股盈利1.15美仙，由於下半年PLDT業績會更理想，而印多福亦會有改善，估計全年每股盈利可上升至2.6美仙（折20港仙），現價PE亦不足8倍，上升空間極大。
宜進利（304）整固一輪後，噚日又再發力，高收0.93元，升7仙，公司管理層呢輪頻頻見芬佬，呢兩日由日資大行安排，主席周湛煌去咗日本做路演，聽講反應好好，噚日股價突有異動，可能係大升前奏，昅實可也。
郭兆誠