曾經係萬人迷嘅前英格蘭國家隊隊長白賴仁笠臣，經過兩年冇嘢撈之後，日前終於獲邀執教尼日利亞國家隊。「神奇隊長」執教「超霸鷹」，呢個組合夠晒新鮮。但係尼日利亞足總擺明對佢信任度有限，只為佢提供一紙半年合約，佢交唔出成績又要講拜拜，「神奇隊長」半年後使唔使再當失業大軍，就睇自己造化嘞。
其實尼國足總呢次主要搵佢領軍征戰三個月後嘅非洲國家盃。話說尼日利亞響八○同九四年都係由外籍教練領軍稱霸，笠臣壓力真係千斤重。
白賴仁笠臣同非洲足球風馬牛不相及，好難估計佢呢次上任嘅成敗。肯定嘅係，呢位過氣名將都重算係靚佬一名，將來拍埋成班尼日利亞球員影團體相，一定顯得佢更「英」。
雲達不來梅後衞卡斯達積周一證實喺季尾約滿後會過檔史浩克04，重簽約四年㖭。我求大俠對佢有咁嘅決定感到意外，話晒不來梅今屆打得咁好，來屆分分鐘有份踢歐冠盃，但史浩克就極之沉淪。不過好多足球員希望能喺當打時搵多啲錢，話唔定佢都因為咁先轉會。
利物浦今屆表現重未有起色，我求大俠收到路邊社消息，話「紅軍」領隊侯利亞喺下個禮拜會叫暫時冇班落嘅克羅地亞國腳列柏錫嚟試腳。我求大俠並唔係話列柏錫唔好波，而係「紅軍」嘅問題，相信唔係可以憑加入一、兩個球員就解決，我諗侯利亞都明呢一點。
佩魯賈會長加奧斯不嬲都以言論出位見稱，當國米會長莫拉堤日前向教練古柏發出最後通牒之際，加奧斯失驚無神呼籲國米應該請前國家隊教練索夫執教。佩魯賈今季戰績麻麻，加奧斯自己球會都未理掂就走去理人哋嘅事，都幾無厘頭，不過又一次達到見報效果。
「塞翁失馬，焉知非福。」莫湯保雖然俾網隊飛起，之不過唔單止收番成三千萬美金補償，𠵱家重成為搶手貨㖭！話說速龍、紐約人、魔術同熱火都想拉攏莫湯保過檔，人工方面最少都有四至五百萬美金，而且出場時間重肯定比喺網隊嗰時多，莫湯保呢次真係可謂因禍得福囉！