立法會一開波，民主派就郁阿董，劉慧卿又動議叫阿董辭職，加埋沙士報告民怨、填海又搞到一鑊泡，鄭少秋一出場，今次股市終於冇冧到，「丁蟹現象」暫時冇兌現，不過可憐就係阿董今次做蟹，一翻風秋涼，立法會開張，就要落鑊。
𠵱家啲報館，有總編輯，又興開多個位叫執行編輯，八方預卜過，7.1遊行之後，民建聯曾鈺成會做總特首，而阿董只不過係執行特首，曾主席單一單隻眼，阿董就跳一跳，真係俾八方講中。民建聯「建議」親乜嘢，阿董班子都聽話收貨：東江水減價、取消陸路離境稅、押後二十三條立法，全部都係民建聯「急市民所急」在先，阿董跟住「想民建聯所想」在後，雙方心心相印，情投意合，民建聯話乜，阿董就做乜。
以阿董份人自尊心咁強，乜人嘅意見都唔聽，點解會對曾鈺成咁千依百順？唔使諗，睇吓國家嘅曾副主，最先高調會見邊一個政黨嘅阿頭就知。明年立法會選舉，7.1之後，民建聯民望全線告急，重危殆過阿董。國家一時要救兩個病人：一個急性心臟病，一個中風。中風嘅嗰個，重有四年命，就算醫番都係植物人。但心臟病嘅嗰一個，重有流流長下半世，醫生就得咁多人，你話優先應該救邊個？
民建聯喺香港係冇任期嘅，明年立法會選舉．如果輸晒，咁立法會就會變為民主派嘅另一個政府。阿董有乜政策，立法會就唔通過，阿董叫向左走，立法會就向右走，避免立法會淪陷，首先要同民建聯做緊急手術，裝番個起搏器，再用氣功大師喺北京遙距輸送真氣，出年立法會先至可以有把握，都重喺人民嘅手中（至於自動變色嘅自由黨，老實講點樣自我赤化法，國家都當佢冇乜到嘅嘞，七七事變喎，你估國家真係咁易對田少哋失憶咩）。
民望方面，成個董班子，煲呔曾高踞第一，不過煲呔最近俾親中派篤得好緊要，話佢係繼陳太之後嘅「無間道Ⅱ」，加上煲呔的確又係肥彭時代嘅欽點留低接班嘅，又應咗「萬官帶不走、惟有業隨身」嗰一句。所以阿董推煲呔做前線，頂阿卿姐嘅炮火，呢招夠毒，可謂一箭雙鵰，後面如果冇高人教，就勢係假。
總之今後三年幾，無論立法會淪唔淪陷，民建聯都將會變成執政黨。曾主席單一單眼，阿董就跳一跳，不過阿董唔好誤會，曾主席有眼疾，佢隻左眼成日都單單哋嘅嘞，阿董要睇真啲，唔好係咁一直跳落去，跳到唔識停腳喎。
傳真︰2623-9278
電郵︰