恒地（012）批股，影響地產股同大市氣氛，恒指跌過110點，埋單只唔見10點。
紅籌國企普遍高過前市，聯想（992）買賣盤球球聲，擺明對撼，全日有62球易手，幾乎係前日兩倍，收3.225元，升10仙。
聯想係高PE股，有名牌效應，近排落後大市，到咁上下自然有芬佬追落後，上月高位3.55元，仍有水位，由昨日交投量嚟睇，短期個勢仍然係向上，聯想Call輪吼得過。
聯想Call輪有兩件，9937同9659。9937係鎖定回報輪，實際數據如溢價等唔易計清楚，只有專家先至啱玩。9659係正常Call輪，係主角，12月到期，輪價43.5仙，溢價2.8%，槓桿率7.4倍。咁嘅溢價，唔係嘢，正股1日變化，幅度分分鐘超過呢個百分率。上月高位74仙，𠵱家個價大把水位。
老牌紅籌繼續跑贏大市，但中信（267）低見16.35元，散35仙，收16.65元，跌5仙，有機跟番紅色大隊上番去。中信Call輪可以搵一兩件玩吓短線。正路對象係9646，隻輪明年3月到期，輪價19.6仙，溢價3.5%，槓桿率8.5倍，數據靚靚，博得過。
章盛