我羅拉最近發覺Morning娘家族嘅成員真係好鍾意去夏威夷拍水着寫真集！不過都係嗰句，橋唔怕舊，陽光與海灘加活潑少女呢啲咁賞心悅目嘅畫面，男女fans都啱睇嘅！
最近分開咗做「乙女組」同「櫻花組」嘅晨女，就拉大隊去夏威夷影咗本叫《ALOHA!Morning娘櫻花組&乙女組寫真集》，但我羅拉為免太大堆頭令各位睇到眼花撩亂，決定先派出櫻花組四大花旦安倍夏美、矢口真里、紺野朝美同龜井繪里畀大家品評一吓。
四個入面，當然以隊長安倍最養眼，可惜佢就嚟要離開晨女作個人發展，所以佢話喺夏威夷嘅時間，都盡量同隊友玩得癲啲，希望可以留多啲愉快嘅回憶喎！
至於最具成熟韻味嘅，就梗係是非精矢口，佢之前出嘅個人寫真集已經非常性感，今次佢就特意剪咗一個清爽短髮，以清新自然一面示人。
十六歲嘅紺野同十四歲嘅龜井，新加入已經一段日子，但始終引唔起人注意，今次首次着水着，表現就更加怕怕醜醜，不過最好笑係紺野，佢話喺機場見到有免費果仁攞，掃咗八袋喎，正一大鄉里出城！