自詡為全中國最貴、要成七、八千萬一間嘅別墅項目上海檀宮，果然魅力非凡，吸引到東亞銀行大班、兼立法會議員李國寶，親自去地盤參觀。
噚日檀宮發展商上海華麗家族公司嘅總經理鄭栩生講，早排寶哥哥去上海，聽到上海有個咁貴氣嘅盤，就同太太去地盤同售樓處行咗一轉，並刺探有乜富豪睇過或預訂。但因為睇得買得嗰度富豪，個個都唔簡單，曾鄭重要求發展商千祈唔好大口，所以就算係寶哥哥問到都無面畀。
另外，講到咁巴閉嘅檀宮，發展商亦好揼本。單係樓書，就用咗四百幾萬人民幣去做，一冊樓書有九本，每套成本超過八百蚊。
呢本樓書原來重請咗名作曲家顧家煇個仔KEN顧負責設計，KEN顧之前有幫長實加拿大樓盤設計唔少樓書。
另專程去法國搵石礦採石，運番嚟起屋，淨係買石就花咗六千幾萬人民幣。
發展商唔想平賣樓盤，於是想辦法同物業增值，提升用料質素。新地同信德發展嘅長沙灣昇悅居，近排收緊樓，唔少睇完現樓嘅市民同埋住客，都大讚廚房嘅強力抽油煙機一流。聽講呢類吸力咁強勁嘅抽油煙機，通常係銀碼較大嘅豪宅樓盤至有提供，中小型住宅隨樓附送就十分少見。
電盈薄扶林貝沙灣二期南岸售價愈賣愈貴，不過銷情似乎冇乜影響，一樣咁暢旺。由9月頭開盤到𠵱家，已經賣咗五百幾個單位，負責嘅電盈基建主席李智康總算飲得杯落。以五百萬股電盈，重金禮聘佢過檔嘅電盈主席李澤楷亦好有眼光，搵到個好幫手，咁短時間幫到公司套現四十幾億。
不過，最近業內傳出李智康會離開電盈，咁震撼嘅消息，蘭西自然第一時間打電話畀李生問個清楚，但佢秘書話李生上個禮拜六，出席完貝沙灣嘅時裝表演同埋晚會後，就飛咗去度假，下個禮拜尾先至返港。蘭西會密切留意事態發展，再向大家報道。
樓市今個月交投重係唔錯，代理趁勢擴張開分行，美聯物業喺尖沙嘴柯士甸道嘅新九龍豪宅分行，今日開張，美聯集團主席黃建業主持開幕儀式外，重請嚟新地代理執行董事雷霆（圖五）出席，咁嘅陣容，傳媒又點可以唔採訪呢？果然高招。
蘭西記得美聯旗下香港置業，喺尖沙嘴港景峯對面嘅分行開張時，都有請長實高層出席。睇嚟遲吓代理分行開張，請發展商出席，會成為趨勢。
另外，美聯為期四個月嘅「飛虎系列」培訓課程，今個禮拜四進入第三部份，係學習劍道。
樓市轉旺，連銀主盤都多咗人吼，業界估計，上個月成交嘅銀主盤，應該超過六百個，賣出單位比放盤量為多。不過，由於銀主要求嘅價錢都升番五個巴仙到一成，所以喺上月下半月，交投已經有放緩嘅迹象。
今個月情況會係點，業界估計應該冇上個月咁理啦。
蘭西
電郵地址：
