一位讀者賴先生來郵，提出一個好好嘅意見，就係《信報月刊》九月號有一篇饒餘慶教授寫嘅大塊文章《香港的通縮問題》，討論聯繫滙率應否廢除，以解香港之困。賴先生話呢篇文章發表咗成個月，冇人反應，冇人討論，實在可惜，亦反映香港人對實質有意義嘅辯論，冇乜興趣。
賴先生要求左丁山透過本欄通知《壹週刊》高層楊懷康，請佢回應。老實講，賴先生，楊社長一定睇過嘅，唔使左丁山通知。至於大社長有冇時候回應，我哋就唔知嘞。饒教授篇鴻文，左丁山係第一時間睇過嘅，亦曾見過某一個報紙專欄討論過，既然你提起，不如簡單介紹饒教授嘅論點：（一）世界上冇一個地方情願以犧牲就業與物價穩定的手段，來維持固定滙率了，偏偏香港還是死抱着過時的「內部調整」的藥方不放；（二）香港的聯滙制度是貨幣發行局制的變種，而此制又是金本位的變種，金本位便因要求內部調整來維持黃金的可兌性和滙率的固定性而受詬病的。
饒教授認為根據香港國際投資額頭寸數字，如果港元脫鈎，真的貶值（其實現在正在升值），民間財富總的來說，非但不會減少，反會增加，姑勿論目前是否脫鈎和貶值的最佳時機，傳統的反對論已不能立足了。各位對任志剛嘅老師、貨幣發行局制專家饒餘慶教授嘅文章有興趣嘅話，請睇《信報月刊》九月號。照計任總喺佢自己專欄之內，為文駁斥饒老師，先至叫做尊師啫。冇理由粒聲唔出㗎。