港股連續第4日上升，恒指衝上11800大關後出現爭持，最高曾上升230點，午後升幅收窄，但收11734，仍有125點進帳，成交178億元，期指高水26點。
大市上升，主要係熱錢入市帶動，喺呢個回合，基金同大行擔當重要角色，勇往直前，但小投資者就且戰且走，有唔少重一路減磅，就以噚日為例，下跌股（不計認股證）竟然超過300隻，好多散戶都寧願沽貨計數，唞一唞，等調整再玩過。
基金同大行何嘗唔知個市需要調整，但佢哋買貨係計平均價，由高買到低，再由低位掃番上去，咁樣先可以買夠貨，即使恒指會調整一千幾百點，對佢哋而言，只係幾個巴仙波幅，無傷大雅，因為下一個升浪，佢哋預計嘅升幅唔細，起碼有三四十個巴仙。
熱錢除咗買藍籌外，噚日又再向紅籌股進軍，幾隻大價紅籌都出現賓虛嘅場面，好似華創（291）、招商局國際（144）同中遠太平洋（1199）都升0.3元，上實（363）則升0.5元。以成交股數計，最活躍係第一上海（227），高收0.85元，升5仙，基金買盤全日鍥而不捨，其實，基金早前已經做過一場大騷，相信大家印象猶新。
喺9月初，第一上海一連3日大升，由0.6元飆上0.9元，大行同基金擺明車馬要貨，3日總成交成3億股，佔總發行股數11.7億股的25%，之後股價在高位整固，形成雙底，噚日升勢再現，衝破降軌，且有大成交支持，照度上去，目標指向1.15元。
第一上海主要係做證券買賣投資、企業融資同股票經紀業務，以及投資控股。上半年，雖受非典影響，集團的證券業務仍有理想表現，下半年港股大旺，無論係投資和佣金收益，都會非常可觀。由於港股已步入牛市，預期這方面盈利會持續高增長。
集團持有逾40%的好孩子公司，上半年業績表現突出，估計全年盈利可達1.2億元。好孩子分拆時機已成熟，在內地上市PE可達20倍，保守估計市值不少於22億元，第一上海佔好孩子的權益，已幾乎相等成家公司的市值，分拆亦會為集團帶來可觀的特殊項目收益。
03年度（12月年結），估計第一上海盈利1.1億元，每股盈利9.4仙，下年度上升至12仙，紅籌股PE平均逾12倍，以10倍計，股價已可見1.2元。
郭兆誠