花費三百萬公帑做的沙士調查報告，通篇表揚政府處理沙士得宜，沒有任何人失責瀆職。1755個感染個案，299名死者，報告權威性地來個蓋棺定論，沙士乃係天災突變，不應深責當權者。
醫管局主持人自稱做得不夠好，但四萬咁口說「我相信我冇做錯」。調查委員那位阿嬸慈悲為懷，講到279頁報告，鐵口一批說「今日再寫多次，我一個字都不會改」。眼淚鼻涕一齊來的局長，自感天降大任難自棄，「我辭職對香港係咪好事呢？」辭職純粹齋諗，無意實行。他長一智地諗你所諗，已經夠晒誠意。廣東話忽然進步了，繼續在位，耐心等待下一劑，母語抗SARS。至於升職到日內瓦的高級公僕，日日食瑞士打針雞，回應記者雞同鴨講，堅持不會向市民道歉，因為「我心裏已有歉意。」這些發瘟廢話，未來再爆發沙士的話，準會被迫再聽一遍。回憶三月那場人為春瘟，倒瀉籮蟹的疫區九一一恐怖情景，無人能像醫管局董事鄔維庸那麼人面獸心。
沙士令唔知驚、唔識死的市民醒悟，不能信政府，不能靠政府打救。我悲憤地想，沙士重臨之時，惟有自我隔離，還是感染了，自療不成功的話，只好自縛於輪椅上，投身維多利亞港。到時死亡證不必偷偷摸摸給亂安排個「尿道炎」的無稽死因，大大方方承認「自殺式顛覆維港填海工程」！死因是「參與非典型叛國活動」！