新車速報：豐田LandCruiserCygnus<br>設備升級享受至高

新車速報：豐田LandCruiserCygnus
設備升級享受至高

近年，CitySUV推陳出新，惟豐田LandCruiser嘅Cygnus，仍企穩當中一席位置，未受一眾歐洲車所動搖；最近，廠方重替車系推出有一部至Top嘅頂級特別版，唔止一身專色嘅BodyColour，內裏重有高級皮椅、MarkLevinson音響連DVD及MD嘅AV系統，加上電子液氣壓避震同恒式四驅系統，大可攀山涉水任我行㗎！
記者、攝影：陳偉林
ImageGirl：Irene

專色突出又見剛勁美
一身專色嘅豐田LandCruiser頂級Cygnus特別版，除顏色突出吸引外，一對炯炯有神嘅Xenon頭燈，加上四輪特大18吋專用胎軨配搭，還有原廠尾定翼連High-mount煞車燈，重有車身兩旁嘅門枕腳踏，既具氣派又見全天候四驅越野車嘅一身剛勁魅力㖭！

■大面板LED尾燈，有高透光性嘅安全感。

■高置時款尾定翼連High-mount煞車燈，可有多一份穩妥同可靠性。

■兩邊特大門鏡，重有原廠頂置標準行李架裝備，好啱郊遊戶外用。

■車身兩旁特備原廠門枕腳踏，令上落倍感方便。

■附設G-BOOK功能嘅LCD大屏幕，倒車泊位重有閉路電視監控。

原廠皮椅及裝備夠吸引
賣相討好之餘，車廂重有三排八座位嘅原廠皮椅配搭，加上享受至賞心悅目嘅MarkLevinson音響系統，以及DVD連MD嘅AV裝置，響寧靜又寬敞嘅座艙中，享受透心涼意嘅前後獨立恒溫冷氣連送風口嘅悉心安排，大可媲美至豪華嘅轎車氣派㗎！再者，後排重可以左右獨立收摺起，又可將中排摺叠起，令尾廂嘅載物空間可有近倍增！

■整個座艙鋪排講究又細致，媲美傳統高級轎車格局。

■尾後左右獨立收摺起，令尾廂空間倍增。

電子液氣壓避震全天候皆宜
講到引擎裝置，一台達4.7公升V8偈輸出澎湃之餘，匹配一套5前速自動波，轉檔反應利落暢順，加埋原廠電子液氣壓避震可調校軟硬嘅吸震效果外，重可以將車高調高或調低，有利作日常城市代步，又或者郊遊攀爬崎嶇嘅山路都無問題，置身其中絕對畀到你有柔韌富支持力嘅行車感㗎！

■媲美凌志格局嘅一體式中控台，既有前後獨立冷氣，又有MarkLevinson嘅DVD連MD高級AV系統。

■一套5前速自動波，除備有Power模式外，前方重有電子液氣壓避震軟硬同高低調節。

■中排左右可前後移動，進出尾廂亦不覺侷促。

■三排原廠皮椅軟滑貼服，前排更備有全方位電控同記憶組合。

記者評語：設備齊全至愜意
呢部屬特別版嘅Cygnus，全新BodyColour與別不同之餘，佢重裝有原廠至頂級嘅MarkLevinson音響、高級DVD連MD，重有可上網嘅G-BOOK裝置，加埋電子液氣壓避震跟原廠真皮椅包裝，單係乘坐同享受就經已教人難以抗拒㗎！

Irene評語：坐得舒適賣相又夠型
部車外形份量十足又Man之餘，車廂三排八座位皮椅軟滑又貼服，加上出眾嘅隔音效果，置身其中欣賞動聽悅耳嘅DVD音樂節目，又或者係悠揚樂曲都不成問題；然而，最令人難以信服佢竟然係一部全天候豪華四驅SUV呢！

豐田LandCruiserCygnus規格
引擎：4663V8DOHC
馬力：235ps/4800rpm
扭力：43.0kgm/3600rpm
傳動：5前速自動波，恒式四驅
懸掛：（前）雙搖臂（後）拖曳臂
制動：（前）透氣碟（後）透氣碟（ABS）
輪胎：275/60R18BridgestoneDuelerH/T
尺碼：4890×1940×1890mm
軸距：2850mm；車重：2470kg
平均耗油：6.3km/L
新車售價：約港幣60萬起
車輛提供：富利堡汽車（28776700）

■Cygnus一台4.7公升V8偈，表現狠辣有勁。