電訊盈科贊助旅遊發展局一項刺激本地消費嘅活動，送出頭獎薄扶林貝沙灣單位一個，市值340萬元。
呢個一期744方呎嘅兩房單位，因為近期貝沙灣二期南岸愈賣愈貴而升值，代理話𠵱家一期嘅放盤單位，平均呎價超過5000蚊，兩房單位叫價大概380萬，即係話，得獎者無形中賺多咗幾十萬。
呢位幸運兒噚日由電盈營業及事務總監顏金施，喺超過100萬張參加表格中抽出，係嚟自西半山干德道嘅外籍人士。顏金施話，得獎者嘅背景咁啱同貝沙灣嘅買家客源非常相近，都係住開半山區嘅外國人。
佢總結番個盤嘅銷情，第二期南岸到𠵱家已經賣出超過560個單位，佔總數八成半，計埋一期544伙，暫時套現86億。剩番唔夠100個單位，有望年底前賣晒，不過第三期會如期明年中先至推出。
市道興旺，地產代理大豐收。今個月過咗唔夠一個禮拜，美聯物業就火速出現過百萬分行。
呢間極速喺5日內閃電誕生嘅分行，就係中半山會景閣分行。噚日美聯主席黃建業親手頒獎畀負責呢間分行嘅主管助理區域經理何銘培，以示表揚。截至噚日，呢間行已錄130萬元嘅營業額，打破上個月首間百萬元分行7日誕生嘅紀錄。
聽何銘培講，今個月頭5日促成交易中，一手盤包括3500幾萬嘅富豪海灣、2000幾萬嘅中半山雅賓利，及3間總值3100萬嘅薄扶林貝沙灣二期連環成交。
中環填海官司政府勝訴，工程可以繼續動工。噚日下晝出席記者會嘅恒基張炳強，一到場都未講到樓盤優惠，就已經大歎可惜。佢話身為香港市民，當然唔支持填海啦，重好惋惜咁話，維港夜景係世界4大夜景之一，填海好有影響。
同佢一向合作無間嘅新世界何伍燕榆就少有咁打對台。何太覺得政府已經讓咗步，填海嘅面積又細咗，實在要顧及疏導交通。似乎地產界就呢件事各有各睇。
未正式開售已獲市場搶住預留嘅單幢新盤土瓜灣都會151，發展商華人置業）重未正式公布發售詳情，噚日市場卻流傳個盤已有二手成交，唔通樓盤未開賣已「摸出」？
市場流傳呢個單位係中層C室，591方呎，以152萬元獲預留，噚日有買家以高出原價10萬承接。不過，代理界表示，樓盤重未簽定任何買賣合約，何來二手買賣兼獲利？聽發展商消息，唔使咁心急，等樓盤個示範單位今個禮拜開放後，就會開售。
樓市稍見起色，地產代理行開始計劃擴張，咁自然要請番啲人手啦！蘭西聽講一啲以前「退出江湖」嘅代理，部份都再度「出山」，最近地產代理監管局續牌人數都多番啲。
過去幾年因樓價下跌，生意難做，搞到好多代理索性暫時唞唞；有啲就因為搵唔到食而轉行。𠵱家樓市有景，啲舊人就返出嚟，佢哋經驗豐富，扯單自然駕輕就熟啦。
蘭西
電郵地址：
