港股噚日原本氣勢如虹，點知下午傳出有大藍籌配股，令好友當堂打個冷震，恒指升幅收窄至125點，收報11734，成交178.62億元。最後證實原來係股價已高出資產淨值幾個巴仙嘅恒地（012）配股，抽水二十幾億，隨即令市場憂心藍籌集資浪潮會湧現，大市或因此調整。
黑客話，暫時未使驚，因為大市水多，而恒地一向貨疏，基金在市場買齊貨唔容易，繼續乾炒則會增加風險，須透過配股才可以大量增持，對恒地而言，以高於資產淨值價配股，何樂而不為？
當然，恒地配股或多或少反映主席李兆基對樓市前景唔太樂觀。不過，聽聞恒地配股認購反應異常理想，如果貨落入對沖基金手上，恒地可能重有一輪升浪。
除咗恒地配股外，長實（001）亦想趁息口未升，發行100億元零售債券。ｉ師傅話，恒地與長實負債水平唔高，但都大舉抽水，可能係睇好香港經濟表現，或有重大投資計劃進行，若屬實，則係一利好訊號。
TCL國際（1070）噚日成副洗倉格局，股價大跌6.4%，收2.175元，成交達1.15億元。歐資續唱舊調，看淡TCL手機業務。其實隻股基本因素冇乜點變，但其他股份造好，佢就仍然呆滯不前，芬佬唔換馬就勢係假。
華晨中國（1114）遭董事減持，本屬利淡消息，但噚日股價仍勁升7%，原來內地在黃金周假期宣布，准許外資在國內設立汽車融資公司，勢將刺激國內對汽車的需求。其他汽車股如駿威汽車（203）升5.85%，慶鈴汽車（1122）亦升4.2%。
阿虎