日前吳啟華俾周刊影到佢喺北京一拖三，大模大樣帶女返酒店之後，各地傳媒都想佢出嚟回應吓，但佢一直採取迴避態度，直至前日佢終於肯講番件事，不過就唔係同香港傳媒講喎，而係同內地記者講。
啟華話：「自己現在正忙於《佳人有約》的拍攝，我每天忙個半死，只有一個小時的睡眠，想不到還有這麼無聊的事情對外流傳，拍攝完此劇，我會起訴失實報道的媒體。」
吳啟華個助手又話嗰三個女子其實係佢嘅圈外朋友，並唔係女公關，完全係一場誤會喎。雖然吳啟華有佢自己自圓其說嘅一番解釋，但令唔令人相信又係一回事。
陶大宇同吳啟華相識多年，講到啟華唔肯面對香港傳媒，大宇力撐話：「個個人處事唔同，冇嘢嘅，誤會啫，啟華做乜我都支持佢，喺工作上，希望佢唔開心嘅事唔好放喺心度。」
其實好多藝人都鍾意去到外地做嘢時就召妓，以為冇人知，但時代唔同咗，香港狗仔隊無處不在，藝人自己最好檢點啲。
劉燁噚日喺北京嚟香港宣傳電影《戀之風景》，今次佢重帶埋女友一齊嚟，已經諗好帶女友去海洋公園玩。問劉燁係咪上次同林嘉欣傳過緋聞，所以帶女友闢謠？劉燁話嗰次女友專登打電話試探佢，搞到要同女友解釋成件事，但係佢就認為冇乜必要因為其他人亂講特別同傳媒澄清喎。
Cookies、Shine同一班歌手噚日一齊出席「森美小儀歌劇團」嘅記者會，但係緋聞男女Shine嘅徐天佑同Cookies嘅Miki雖然有同台演出，但係就冇眼神交流。Miki話：「我都冇話過唔大方合照，影囉，總之工作還工作，我係唔會專登話要分開演出。」不過，佢哋兩個始終都冇企埋一齊合照，只係得張離行離列，幾乎睇唔清人樣嘅大合照。
韓國人氣偶像車太賢憑《我的野蠻女友》喺香港大受歡迎，佢嚟緊喺下星期六（十八號）嚟香港宣傳新戲《瘋狂初戀》，部戲講述車太賢係一名壞學生，但對初戀女友孫藝珍就相當癡心，點知慘遭孫藝珍父親阻撓，因而引發一連串笑話。車太賢今次為咗新片，重專登去電咗新髮型，加上佢生鬼嘅表情，非常搞笑。
陳百祥（阿叻）同王晶一班老友喺前日沙田馬場賽事中，買中咗條孖T，彩金就派七百幾萬。據阿叻講，佢喺上一季賽事入面，兩個月之內就中過六次三T。
噚日搵阿叻問吓佢中孖T件事，不過阿叻對呢件事好似好低調咁，話唔想講咁多。
外國一本雜誌披露霍士同澤東喺明年會合作拍攝三套電影，搵咗王家衞做監製，然後再由佢選角，一向合作開嘅張曼玉、梁朝偉同張震已經係人選之列，王家衞話並唔係一心要打入荷李活，重話今時今日有呢個想法係好老土，只係希望適當運用大家資源，因為亞洲區都有好多優秀導演同藝人咁話喎。果然係大導演，諗法都唔同啲嘅！
