呢排市旺，連創業板股都有得炒作，好似東大照明（8229）咁，就成功完成先舊後新配股計劃，股價噚日大升10.15%，收0.38元，較配股價0.334元高出唔少，有貨者真係飲得杯落。
靚女經紀先兩個月向小初品題過嘅元征科技（8196），聽聞配售8000萬股新股一事，亦好快會落實。
話說靚女經紀喺8月份推介元征時，股價由1.78元，升過上去2.15元，但8月底股東會通過配股一事後，股價就勁回，低見1.67元。靚女話，皆因批股價尚未落實，要同芬佬講數，投資者當然想買便宜貨，但幕後人當然唔係咁諗，所以股價走勢波動。
由於配股最後限期在本月底，據聞有關人等努力周旋下，終於搞掂配股一事，所以近日元征股價好番好多，噚日升5.7%，收1.85元，買盤陣勢重擺得相當有氣勢。
靚女又話，東大和元征同其他創業板嘅分別，就係公司業績見得人，管理層有心做靚盤生意，最終目標係轉到主板。
慕容小初