皇馬球星多好睇好使，不過間中又令人激心激肺。好似周日對愛斯賓奴咁，通街皇馬上盤客，都俾佢哋搞到欲哭無淚！
我求大俠知道皇馬雖然要讓兩球，但仍然吸引好多梳打埠嗰邊嘅上盤客，事關愛斯賓奴材料有限！點知皇馬要到下半場至攻入第一粒，雖然冇耐就再博到十二碼，好衰唔衰係費高主射；我求大俠當時都有不祥預感，事關費高嗰種「窒步」射十二碼方式，失過好多次，最後真係唔入……
都係「哨牙仔」好嘢，臨完場前梅開二度。上盤客都正暗歎呢場走盤都願之際，點知皇馬最後一分鐘失波，難為上盤客最後都冇覺好瞓。
講開博上盤，同一晚基斯普完場前幫車仔頂成二比一，就可謂上盤客及「車仔躉」嘅財星嘞！而呢場波突然佔得「車仔」正選位嘅侯夫，似乎係球隊秘密武器，我求大俠見佢喺比賽中射咗腳罰球，勁到好似炮彈咁，好似講波佬話齋，極有當年朗奴高文影子，各位可以留意吓！
英超聯風格出名夠晒激烈，各支球隊打到最後一刻都會搏盡，弱旅不時有搶分機會。不過上周聯賽，頭九場已進行嘅聯賽竟然冇一場和波，的確少見！結果最後嘅維拉對保頓真係和波，而維拉前鋒安祖完場前都要射失十二碼，呢場和波唔通真係個天整定嘅？
英格蘭桌球手奧蘇利雲果然夠神化，啱啱先話由天主教改信回教，點知前日又話一切都只不過係一場誤會，佢重未係回教徒。呢名前世界冠軍重話上個月俾人拍到喺倫敦一間回教寺入教嘅照片，不過係去了解一下回教，同埋感受一下嗰啲氣氛喎！咁都得？
巴西新星卡卡前日喺米蘭打吡戰表現唔錯，重射入意甲第一球，不過佢響比賽中同對方球員基利爭波時踢中對手，擺明「抽水」，結果兩人老羞成怒幾乎講手；睇卡卡之前比賽都冇乜類似動作，唔通巴西人同阿根廷佬真係有仇？點都好，後生仔千祈咪好學唔學玩小動作至好。