美國出個靚數據，9月份非農業職位增加5.7萬個，係8個月以來首次有職位增加，大出市場意料之外，若趨勢持續，美國經濟復甦勢頭將更加穩固。
受此消息刺激，美股上周五造好，杜指曾大升179點，尾市回順，仍升84點。金價則大跌，紐約12月期金收370美元，跌13.7美元，為6年來最大單日跌幅，睇嚟資金又重回美股。外圍如此氣氛下，港股短期應有力更上層樓。
基金同大行主導今次大升市，佢哋嘅投資組合除藍籌外，國企同中資股亦佔了好大比重，特別係國企嘅升幅以倍計，斬獲甚豐。雖然有少數基金減磅，但亦有基金上車，特別係調整過後，基金買盤又轉活躍，佢哋睇好後市，有信心在下一個升浪中，國企同中資股重會有幾成嘅升幅。
股神睇中隻中石油（857），升幅已近6成，芬佬轉而求其次，向中國（香港）石油（135）埋手，密密收集已有好一段時間，佢哋計過條數，在現時油價高企的情況下，中油的盈利能力好強，今個年度（03年12月結），盈利肯定大增，以持有半年計，心目中嘅上升目標係1.2元。
03年度的上半年，中油營業額11.07億元，升50%，獲利3.13億元，大升96.1%，每股盈利6.48仙，不派中期息。期內原油銷售618萬桶，升20.7%，上半年國際原油價格回升，加權平均售價每桶約24.98美元，與前同期的18.18美元比較，價格升幅37.37%。
中油主要在中國、南美、中亞及東南亞從事原油開採及生產，盈利主要來自中國，期內營業額8.58億元，升50%，分部提供盈利3.92億元，升90%；南美及東南亞營業額同為1.24億元，分部提供盈利分別為2361萬元及2847萬元，上升96.2%及92.8%。
集團新收購的石油項目，包括緬甸及阿塞拜疆的油田，還未進行大規模開發作業，在上半年未有提供收益，隨着全面勘探及開發後，對集團盈利將會提供重要貢獻。
下半年油價高企，收益將更佳，估計全年盈利可上升到6.5億元，每股盈利13.7仙，預測PE僅為6.2倍，派息5仙，息率接近6厘。中油近期股價表現轉強，短線阻力在前高位0.88元，若衝破，照度上去，初步目標指向1.0元。
郭兆誠