前晚睇拉科五比一大破馬體會，喜見拉科前鋒彭迪安尼又入波；但係曾經風光過嘅馬體會前鋒摩蘭奴後備入替做咗紅牌阿姑，唉……一起一跌，令我求大俠有啲感觸。
走咗個金靴獎得主馬卡爾，拉科又有件彭迪安尼彈出嚟！佢踢足西甲同歐冠盃八場波，每場𡁻一粒，做到百分百入波！唔通拉科真係慣出射手，彭迪安尼可以繼白必圖、查斯坦同馬卡爾後，又做今屆西甲神射手？
之不過曾經帶領艾拉維斯打入足協盃決賽，今屆冇乜機會上場嘅前鋒摩蘭奴嘅被逐，就真係搞到下盤客冇晒贏錢機會。諗落拉科又真係幾好嘢，事關過往啱啱喺歐冠盃贏波贏盤球隊，好少可以返到聯賽繼續波盤齊贏，拉科果然厲害！
英國傳媒發現米堡嘅西班牙巴斯克人中場文迪達將領隊麥卡倫個名噏成「麥拿連」，不過球迷唔好怪佢，因咁短時間要文迪達講得正英名確係好難，不過佢坦言加盟米堡並非為錢，而係好希望領隊可以改進佢。見佢耷咗咁耐，咁有上進心，我求大俠一於支持佢！
連續輸咗兩場英超嘅利物浦，英超奪標賠率冷到三十四倍，領隊侯利亞已俾傳媒追問幾時玩完？佢聽到有啲火，話球隊曾經連贏三場，但係就絕口唔提贏佢哋嘅車路士及阿仙奴。
老實講，輸呢啲大戰，領隊難辭其咎！或者真係換領隊會沖喜「紅軍」呢？
季初輸死捧場客嘅紐卡素，前晚終險勝修咸頓開齋，入波功臣又係舒利亞，個波重靚到絕；呢位三十三歲老將𠵱家以六個入球排射手榜第三位。老舒除咗救咗紐記外，岌岌可危嘅老領隊卜比笠臣都要錫晒佢。喺呢啲生死存亡時刻，老鬼真係可靠過班成日製造麻煩嘅後生仔㗎。
漢堡根本唔係超班嘅德甲球隊，但係攞咗個季前德國聯賽盃就搞到高晒咁，好多時主場讓波太多，至少都一球，前晚迎戰慕遜加柏結盤就讓到一球?球半，結果贏二比一，又輸盤；𠵱家主場讓波總結係一和三負，捧佢嘅真係淚水都乾，睇嚟以後佢哋主場捧佢嘅對家有着數啲。