名模楊崢噚日下晝去咗銅鑼灣世貿中心，睇新地鴨脷洲深灣軒示範單位，猛讚個廚房同廁所裝修得好靚好吸引，特別鍾意露台設計，又話個盤交通方便，環境夠靜，同埋新地樓出名用料靚，有信心保證咁話。
見楊小姐咁鍾意，蘭西問佢有冇考慮買番間自住，點知佢話自已間屋啱啱做完大裝修，短期內冇考慮搬，不過屋企人住緊嗰度開始舊，打算換樓，佢只係幫吓眼，屋企人遲啲都會嚟睇多次。
蘭西唔明點解冇份住嗰個咁心急又咁投入，反而要換樓嘅屋企人就要遲啲先去睇？
蘭西跟住去新地另一個樓盤將軍澳中心，撞到信和一班高層，雖然佢哋冇講點解嚟睇樓，但唔使問都知，係因為佢哋同區坑口站上蓋蔚藍灣畔，就快開賣，所以嚟視察同區樓盤加價前夕嘅市場反應，好作部署。
九龍倉今年推出嘅樓盤唔多，但個個都賣得唔錯，特別係尖沙嘴擎天半島，九倉助理董事黃光耀呢幾日就設宴慰勞各代理行高層同前線精英。中原、美聯、利嘉閣同港置都有獲邀請食大閘蟹宴。
聽講代理行喺9月份，每做到一個擎天單位成交，就可以有一個張蟹宴入場券。當晚總共擺咗十一圍，發展商佔一圍。中原話佢哋有四圍。
九倉今年賣樓收益目標係三十億至三十五億，上半年收約十五億，第三季就已有十五億，已經達到目標啦。
中原地產上月大豐收，住宅同工商舖部門佣金收入近一億四千萬，公司早前定下佣金逾一百萬嘅組別，可以攞到五千至兩萬蚊獎金。中原董事總經理黃偉雄講，有近四十組攞獎，當中八組過二百萬，最高佣金嘅一組係西半山輝煌臺分行，有三百八十萬，重係唯一過三百萬佣嘅組別。
佢話既然公司上下心態咁進取，所以就將今個月佣金目標，提高到一億五千萬。估計「食胡盤」係逸樺園、何文田君頤峰同赤柱富豪海灣。
黃偉雄話，上月攞到獎嘅大部份係港島區組別，原因與薄扶林貝沙灣，同鰂魚涌逸樺園開賣有關。上個禮拜五已經喺公司派五百蚊利是畀後勤員工；攞到獎嘅組別，規定要搵埋嗰組嘅行政部同事一齊慶祝。
蘭西上個月提過上海超級豪宅盤「檀宮」，現在有進一步消息，每座別墅賣六千萬到八千萬人民幣，超級豪宅之名真係當之無愧，不過幾時賣都重未有定案。明日會喺香港搞傳媒午宴，到時可能會有多啲詳情。
個盤喺上海西郊國賓館隔籬，只得十八座別墅，面積最細有成一萬七千幾方呎，最大過二萬一千五百方呎。各有獨立恒溫泳池或室內外雙泳池、家庭影院、健身房、按摩池、圖書室、中西式廚房，戶外又有花園等。物業預期明年落成。
蘭西聽喺上海有地產投資嘅發展商講，佢哋都好想見識吓呢個超級樓盤。
長實嘅長沙灣宇晴軒，其中一個賣點係望到維港煙花景，發展商為證實所言非虛，喺樓盤最高層裝咗部攝錄機，話要拍低噚晚「香港國際煙花音樂滙演」嘅煙花盛況，重準備燒錄成VCD，隨樓書派畀睇樓人士。
另外，長實嘅荔枝角盈暉臺，國慶日安排準買家到現樓高層睇煙花，並即時做成交易後，食過翻尋味，噚晚又安排另一批客上去睇煙花，希望又有單開。
蘭西
電郵地址：
