走入九記，以這街坊式店名，以及跟你我屋企樓下間茶樓差不多的裝修，很難想像這家老店跟別府拉麵為同一家子的「老細」；更難想像今年SARS橫掃香江，他還有力一口氣多開三間拉麵店。雖然幾家店的對象仍是中下階層的市民，但由巷仔小店變成10間大店；由賣叉燒做到賣鮑魚，你又有興趣看嗎？
記者：陳慧敏 攝影：伍慶泉
逢星期一至日出版
由65年爸爸那代開始，四兄弟細細個已經在後巷的燒臘檔幫忙執頭執尾。大哥用「打牌」似的手勢攤開信封裏面幾張舊照片：「呢啲係正宗家庭式『企』業，得幾個座位畀客坐，其他人預咗要企住嚟食。個檔口係用擋風板同鐵皮砌嘅，搵張牛油紙，塗啲油，包住啲飯同叉燒，搵雞皮紙袋包住就算㗎喇！」
直至75年一場《清潔香港運動》，小巷企業被一夜拆清。終於爸爸在加連威老道找到舖位，幾年後，更於「開發中」的尖東開分店；87年到百利開店；遇到的挫折包括被所有股東放飛機，以及「六四」事件。但這一切反而讓四兄弟對祖業感情更深。96年，遊日歸來的大哥引入拉麵文化，開了第一間別府拉麵，成為香港日式拉麵的老大。
時至今日，雞皮紙袋已經變成環保飯盒，生意愈做愈大，但上至市場策略廚房用緊嗰把刀夠唔夠利，大哥也要親身兼顧。原來呂氏一家早已學會做事要變通，而且堅守崗位，好似今日見到的一系列新式鮑魚菜，就是這家中餐館變通的第一步。
「我煮嘢唔叻，但最叻係吹水，理論嘅嘢，我睇書、旅行時、喺大師傅朋友身上學咗唔少，活學活用，將之用番喺舖頭，先至有進步，跟得上社會嘅步伐。」例如每次換醬料公司，或者引進新貨，他都會叫廚師先試試醬油的味道有無偏差，以便調節用法。「時代唔同喇！莫講話人嘅口味不停咁變，啲醬料嘅味道都唔會十年如一日啦，所以一本通書絕對睇唔到老嘅！」
這款風味黃金鮑魚與早前大受香港人歡迎的牛油鹹蛋蝦有異曲同工之妙。秘製過的鹹蛋黃醬跟鮑魚好夾，焗過之後更加香口。
一個清淡嘅菜式。竹笙、髮菜、蝦膠混為一體，加上大大條新西蘭鮑片，打埋個玻璃芡，令素食嘅竹笙卷更見豐盈。
「三杯酒」原指同等份量的酒、糖和醬油，這裏選用紹酒，以及雞子，所以甜啲，也易入口，海鮮的香味亦更濃。
正宗鮑魚撈飯，裏面還有海參、冬菇同蘆笋，整籠飯鮑味極濃，爽口又唔韌。
中國風賣相裏面居然係法式煮法，香滑嘅薯茸混入檸檬汁，包住隻鮑魚嚟焗，係就係乾身啲，但係薯茸香軟鮑魚爽口，灑少少椒鹽更加正。
地址：九龍尖沙嘴漆咸道南87-105號百利商業中心地庫
電話：27221663
營業時間：星期一至六11:00am-12:00mn；星期日10:30am-12:00mn
