繼早前我哋先後報道過，兩部以慳油及環保作主線嘅Hybrid引擎車款後，響歐洲汽車銷量跟傳統電油偈不相伯仲嘅柴油車款，又豈止係局限於商用車類咁簡單；早前，我哋特派記者更獲響歐洲研製柴油偈首屈一指嘅法國標緻車廠邀請，前赴法國南部Toulon，實地測試配備最新6前速波箱嘅頂級607HDi豪華轎車。佢用上一台2.2公升柴油Turbo偈嘅耗油量，平均每公里都不過約$0.4，二氧化碳（CO2）嘅排放量亦不過每公里177g而已，行車表現真係令筆者大開眼界。
記者、攝影：李勤
逢星期一至日出版
以德國及日本轎車充斥嘅香港市場，車迷鮮有留意出眾嘅法國車款，然而呢部標緻607，早前經已有運銷香港；講造型，修長扁平嘅輪廓，可給人與眾不同之感，響隔外突出嘅Xenon頭燈跟霧燈組合，加上低斜嘅鬼面罩同一體式氣霸裝置，可謂別具特色，望落好有一份時尚行政座駕嘅格調。
講到座艙鋪排，呢部全新607HDi型號，用上新剪裁嘅真皮座席，圍繞四周重有閃爍嘅電鍍裝飾，加埋講究嘅桃木面板配搭，予人看來豪邁有個性；再者，原車除備有前後六個安全氣袋連充氣簾幕外，還新增後排兩側SideAirbags，以及附有Bluetooth功能嘅免提電話裝置，匹配埋原有高級音響連前後送風嘅恒溫冷氣及照明系統，設備可算係至高級又出眾呢！
鮮有接觸柴油偈車嘅筆者，初首接觸呢部標緻607HDi型號，感覺引擎運轉好寧靜，給人不易察覺到佢嘅引擎配搭之餘，初、中段嘅起跑加速反應更異常突出，匹配最新6前速手動波箱，中、後排仍見加速有力，惟6檔屬超比波配搭，僅適用於有一定車速嘅巡航使用。四輪懸掛表現柔韌有力，令人感受如置身歐化傢俬一樣，實為一款給懂得品味用家嘅理想座駕。
引擎：2179cc直4DOHC柴油Turbo
馬力：137ps/4000rpm
扭力：32.0kgm/2000rpm
傳動：6前速手波，前輪驅動
懸掛：（前）麥花臣支柱（後）雙搖臂
制動：（前）透氣碟（後）碟式（ABS）
輪胎：225/55R16
尺碼：4877×1800×1437mm
軸距：2800mm
車重：1610kg
0-100公里：11.5秒
極速：205km/h
平均耗油：6.6L/100km
新車售價：約港幣28萬起（未連稅）
查詢：靈獅汽車（28663000）
先進文明嘅歐洲國家，配用柴油偈嘅汽車佔市場很高比率，無論引擎輸出、耗油量及廢氣排放量，往往跟電油引擎汽車不遑多讓；好似呢部607咁，不但用上最新6前速波箱、低轉扭力源源不絕外，重有出色隔音同寧靜感，表現真係一啲都唔差㗎！
