自由行帶來好多遊客，據一啲報紙訪問過部份遊客，香港有乜最好景點。答案就係：1山頂睇維港夜景，2海洋公園，呢兩度係遊客必到之地，至於其他景點，係咁意啦。
旅行團帶遊客上山頂，話咁易，所以山頂老襯亭附近，司徒拔道經常塞車，俾旅遊巴士頂實晒。但個人遊客呢，佢哋未必知道點上山頂噃。個人遊客通常揸住張地圖，由九龍坐地鐵去中環，喺太子大廈出口行出嚟搵花園道去纜車站。左丁山就幫過唔少歐美遊客，指示佢哋點樣繞過長江中心直上。但原來上到聖約翰教堂，遊客可能都唔知點樣搵纜車站。
呢日OL李企喺花園道?下亞厘畢道交界，等過馬路，俾兩位講普通話嘅遊客截住問路：「請問纜車站在哪裏？」OL李為之愕然：「在對面！」遊客問：「對面是辦公大樓呀！」OL李為之失笑，睇真啲，諗真啲，只係香港人（可能九龍人都未必清楚）知道聖約翰大廈地下後面就係纜車站，啲遊客喺聖約翰大廈門口都搵唔到，花園道兩旁都冇指示牌（或者唔清晰），遊客只有頭岳岳咁行。其實旅遊發展局與纜車公司應該好易做啫，喺聖約翰大廈面對花園道及萬國寶通大廈兩個方向，豎立一個大指示牌，寫明「纜車站在此」，就得啦，點解唔做呀！我哋啲旅遊設施如果唔搞到userfriendly，只會倒自己米。