最近聽某部戲嘅工作人員講，話呢排天后以身體唔舒服為理由，請咗幾日假，電影公司都以為佢舊病翻發，不過馮仁昭就知道實情唔係咁。
其實最近有個台灣手提電話廣告，畀到好高價錢嗰位女星，咁佢梗係見錢開眼啦，明知部戲趕住拍，如果話拍廣告要電影公司中途放佢幾日假，人哋實唔肯制，咁佢惟有詐病，偷偷哋走去拍埋呢個廣告。
所以呢幾日部戲停晒就佢，個廣告應該拍埋噚日就搞掂，所以佢個病應該今日就會好番，到時佢應該可以開工啦！天后以為用詐病條橋去搵外快就神不知鬼不覺，但其實電影公司有啲高層都知發生乜事，但人哋息事寧人啫。
好心天后做人有啲職業道德，唔好發錢寒，整臭晒自己嘅名聲！
女子組合Cookies噚日喺慈雲山中心舉行簽唱會，有觀眾同保安人員發生推撞，需要警方調解。Cookies表示若歌迷唔守規矩，佢哋會拒絕簽名同影相，作為懲罰。Stephy於本月十五日二十歲生日，到時會同Theresa去東莞拍新戲，Stephy又話生日願望最想買樓。
馬浚偉噚日響沙田為「復康巴士廿五週年」開幕典禮擔任嘉賓，佢即場同十幾位運動員一齊拉郁咗一部四噸重嘅復康巴士，拉到個個都身水身汗。馬仔話今個月十號會去馬來西亞出席一個活動，跟住要趕返嚟香港，出席十二號無綫喺將軍澳電視廣播城舉行嘅正式啟用儀式。
郭晉安噚日喺紅磡舉行握手會，吸引咗大批fans到場，其中一位女fans更攞出一本特區護照，要求安仔喺內頁簽名。對於近日吳啟華被拍得喺北京懷疑召妓，安仔話：「我未同佢合作過，不過都幾潮爆，呢啲係佢私人生活，我自己就鍾意做運動同打波。」之後安仔更笑住話：「我好少食野味，怕有菌，食少餐當減肥。」
盧巧音（Candy）同蕭正楠（Edwin）噚日去又一城出席一個服裝店宣傳活動，佢哋着住黑色皮褸褲出場，一身「皮」氣好鬼型。Candy喺現場睇中個皮手袋，而Edwin就坐喺度試吓鞋。稍後北京有個活動，Candy所屬公司嘅歌手大部份都出席，就只有Candy同黎明唔會跟去，Candy好謙咁話：「冇我都好正常，較北方嘅人唔會太熟我嘅歌。」
