近排大市上升兼夾成交大增，但小初好多散戶朋友都話賺唔到錢，皆因消息股唔多，大隻藍籌又唔輪到佢哋玩，家陣基金玩緊大撼大，散戶只有靠邊站。
經紀黃認為目前咁嘅市況想搵錢，最好跟住芬佬行事，佢推介小初買盈科保險（065），話隻股有機會重試早排高位2.875元。盈保上周五微升2.94%，收2.625元，成交金額2227萬元。
經紀黃又話，推介隻股主要原因，唔係以前炒開嘅股權易手，而係有外資大行同埋基金睇好盈保前景。公司自從轉換管理層後，一來投資組合表現回升，二來保單數目亦隨經濟好轉有所反彈，此外，CEPA同自由行亦帶旺保險公司生意。
據講好多內地人鍾意嚟香港買保險，因為就算有乜𠵱郁，去到世界任何一個角落，都可以收番美金喎。
至於盈保早前因舊CEO減持，影響上升緊嘅股價回落，但經紀黃就叫小初淡定，因為新管理層反應迅速，拿拿聲入稟法院唔准人沽貨，現時沽壓已經冇咁大。
慕容小初