我羅拉比較熟識嘅韓國廣告天后，都離不開全知賢同宋慧喬嗰班，但原來曾幾何時同黎明傳過緋聞嘅李奈英，身價都唔少。李奈英最近幫韓國化妝品牌Laneige拍咗新一輯廣告，淨袋二百萬港紙，呢個重要係佢同呢個牌子合作咗五年嘅「友情價」，藝人同廣告商呢種「友情」真係貴！
呢個廣告今日開始香港都有得播，我羅拉即管睇吓佢貴喺邊。個故事講李奈英喺一個石屎森林入面搽咗啲護膚品，就好似有個大泡泡保謢佢，嘩，乜咁似舒淇嗰個「百毒不侵」廣告嘅？
李奈英係韓國最有名嘅化妝品天后，呢方面重勁過宋慧喬，所以先收得咁貴。唔少韓國女仔朋友都同我羅拉講過，李奈英由初出道嘅厚粉紅唇，變到呢家又索又後生，一早成為佳話。我羅拉重八到，下個禮拜三佢會嚟香港宣傳三日，到時或者大家分分鐘唔認得，佢就係黎明《天士夢》入面嘅厚粉女戰士！