美國就業市場改善，職位8個月以來首次增加，美股點會唔升？杜指上周五進帳84點，納指更大升2.4%。港股在熱錢充斥下本已強勢，好友要繼續推個市上去，呢次唔怕冇藉口。
花旗經濟復甦再次惹人憧憬，美股形勢轉好，喺咁嘅情況下，出口股利豐（494）通常嘅反應係股價向上，利豐Call輪不妨短炒。
利豐Call輪有4件，成交最多嘅係末日輪9438，本月23日屆滿，負溢價0.4%，槓桿率3.8倍，數據可以接受。由於已有負溢價，輪價變化會跟貼正股，不過記住隻輪時日無多，一擊即中或唔中，都要快走。其餘3件利豐輪都係遠期輪，交投好疏。
德昌電機（179）同利豐一樣，近期跟美股回落，跑輸港股大市，𠵱家美股有回勇之勢，德昌亦有望彈番多少，相關Call輪如果啱心水，亦可短炒。德昌Call輪得兩件，9705玩到12月22日，溢價1%，槓桿率5.1倍；9874長個零月命，槓桿率都係5倍多啲，溢價就去到4.1%，兩件中揀，梗係要9705。
章盛