數碼影音：
FinecamL4v2.5吋巨芒夠睇頭

嗱！又再一次證明科技界高處未算高，大亦未算最大，總會有突破！你手上部數碼相機個芒有幾大？1.5定係2吋？不過都唔及呢部最新推出嘅KyoceraFinecamL4v厲害，擁有一個2.5吋巨芒，睇得清楚之餘，無論喺室內室外都同樣夠照！
記者：許福合
攝影：林栢鈞
ImageGirl：Joey(P8)

現時無論高中低級嘅數碼相機，所使用LCD一般由1.5到2吋左右，好似最近Casio部Z4就用咗個2吋芒，而L4v用到2.5吋就比較少見，加埋機身又唔算大，淨係個芒就差唔多佔咗大部份嘅機背。大芒對數碼相機好處有唔少，影相時唔使特別拉近自己，就可以睇清構圖，另外，要與朋友分享相片時都更方便。

靚芒兼慳電
L4v個芒並唔單止大咁簡單，採用嘅DayFineLCD，使用一種雙重反射技術，簡單啲講，就係LCD會比普通嘅LCD靚同清楚，廠方亦特別強調無論喺室內室外，都能保持一定質素，就小記試用時所見，喺戶外檢查相片時，不用遮蓋陽光都可以睇得好清楚，亦可以分辨顏色，證明LCD質素確實唔錯。見到咁大個芒，有人會懷疑會否特別食電，以使用充電池為例，約可連續使用200分鐘，大家應可以放心。

人像測試
L4v拍出嘅相片雜訊較少，唔見有紋或點出現，顏色亦算唔錯，曝光補償+1後，照片整體效果良好，相機測光系統可記一功。

高檔儍瓜機
從功能上比較，L4v會係一部高檔儍瓜機，未設有手動拍攝模式，主要由相機替用家作主，不過仍可個別設定ISO、閃燈、白平衡及曝光補償等，仍有一定自主權。L4v具備3倍光學變焦，另加4倍數碼，焦距相當於35至105mm，完全係一副行街機嘅格局。儍瓜機通常輔助功能特別多，L4v就具備30秒嘅照片語音備忘錄音功能，兼且可拍攝最長120秒嘅有聲短片。另外較特別係可自行設定開機Logo，夠晒獨特！

同場加映姊妹機L3v
L4v解像度為423萬像素，一般拍攝已夠晒用，若果想慳啲位，除咗選擇較低解像度外，更可直接剪裁相片，只保留需要嘅部份另作貯存。不過對預算較少嘅用家，另一部姊妹機L3v就更抵玩，解像度降至334萬像素，功能大至與L4v相若，當然仍有2.5吋LCD，外觀亦相似，只是L4v顏色較深。兩機整體操控亦算唔錯，全部按鍵都設於機身右邊，單手即可掌握拍攝，行街影SnapShot特別好用！

抵讚：Menu選單設計得簡單易用，好快可以搵到需要嘅設定。
要彈：用咗一段短時間後，機身都幾熱吓，放喺手有啲唔舒服。

華仁會電器
電話：23980280
地址：旺角花園街75-77號花園商業大廈5樓及6樓

Profile
感光元件：423萬像素CCD
變焦：3倍光學+4倍數碼
ISO：80、160、320
光圈：F2.8至4.7
記憶卡：SD/MMC(送16MBSD)
電源：充電池或2枚AA電芯
體積：112.5×54.5×35mm
重量：170g