新近買咗一本邱吉爾語錄嘅書：TheWickedWitofWinstonChurchill（或可譯為尖酸風趣邱吉爾），編者DominiqueEnright。只係揭咗幾頁啫，已經笑到捧腹。一個偉大政治人物，擁有偉大語言能力，確是人間瑰寶。
邱吉爾小時候讀書唔多掂，雖係名門之後，入到著名學校Harrow，成績就麻麻，但都入到著名軍校Sandhurst，畢業後從軍，享有戰功。但以正規教育嚟講，就唔算成功嘞。邱吉爾喺第二次世界大戰時做英國首相聲威大震，唔少大學爭住畀榮譽博士學位佢。一九四六年，邱吉爾到佛羅里達州邁亞密大學攞榮譽法學博士學位，邱吉爾話：「Perhapsnoonehaseverpassedsofewexaminationsandreceivedsomanydegrees」（從未有人考試及格咁少而攞到咁多學位！）
呢句說話當然係呼應番佢自己喺一九四○年八月二十日喺下議院嘅著名演講詞其中一句：「Neverinthefieldofhumanconflictwassomuchowedbysomanytosofew」。呢句十分莊嚴，萬世流傳，邱吉爾將之改為調皮說話，自嘲之餘，亦十分自豪！
邱吉爾從政時，參加一九○○年大選，周圍拉票，一位選民鬧佢：「投你一票？我情願投票畀魔鬼！」邱吉爾立即回答：「我明白嘅，但如果你嘅老友唔參選，可否支持我？」呢本書厚一百六十二頁，嗒落有味，有排睇。