上個禮拜個市好波動，地產股又喺班「正苦」高官吹捧推出投資移民下，創出近年高位，重帶動恒指急漲到11600點樓上，好多大型地產股都勁升超過5個巴仙。伏勝上星期同班朋友講開呢單嘢，有個打芬佬工嘅朋友話，有班過江龍靜靜咁調錢入嚟香港，話要短期內買晒地產股，因為聽聞「正苦」會喺11月又推啲新招出嚟谷樓市，實行地產同股市一齊開動，推番高個經濟。
佢重話，班芬佬話要喺11月前買齊貨，叫留意下啲相對細隻而又落後嘅地產股，分分鐘時間一到，啲細價地產股又再有機會發力追過大藍籌，其中有迪士尼概念嘅香港興業（480）就更要留意咁話。
另外，有行家突然叫伏勝留意隻唯冠國際（334），話佢哋現有嘅業務可能會有新突破，點知呢頭未講完，嗰頭個價就由個八直飆到去個九，雖然最後都係落番去1.84元收市，不過個行家話隻股重有得去，皆因傳聞佢哋會同電視機生產大哥TCL（1070）合作，生產等離子電視（Plasma）。由於Plasma電視嘅邊際利潤高過傳統電視好多，尤其係Plasma顯示屏，所以個市好快就反應出嚟。據伏勝所知，全球製造Plasma顯示屏嘅公司得6間，今次同TCL合作嘅應該唔係做Plasma嘅顯示屏，不過，由於Plasma嘅全球定價開始下調，喺需求上升下對只造電腦顯示器嘅唯冠嚟講，未嘗唔係一件好事，個行家話，隻股短期內應該可以見番兩蚊。
伏勝